各位囡仔兄，囡仔姊，逐家晚安。今仔日，英韶阿姊欲共恁講一个故事。這个故事是發生佇我，和恁仝款讀國校仔，五年仔、六年仔的時陣。恁上課的時陣，敢會足認真，抑是攏佮我仝款，偷偷仔咧佮同學𨑨迌？安心，阿姊袂共恁爸爸媽媽講，因為阿姊我，就是上無認真的彼个。
阮的坐位，彼時陣是兩塊桌仔靠做伙，六个人一組。阮彼組，拄仔好就佇老師講台的頭前，所以真正足僥倖的（意思：不幸）呢！上課就愛閣較細膩。尤其我佮阮朋友，攏共秘密寫佇紙條仔頂面，趁老師咧寫烏枋的時陣，緊擲予朋友，老師若越頭，阮就趕緊共紙條仔，窒佇拊仔下面，真正是緊張緊張、刺激刺激。
有一工，佇一節無聊的國語課，我佮我正手爿的朋友，當咧分享阮的藝術作品。我的頭前，坐兩個查埔同學，一个漢草真好，生甲槌槌，看起來古意古意。另外一个細細隻仔，目睭真大圈，看起來古錐古錐。In就親像台灣民間故事的七爺八爺，懸的是阿文，矮的叫阿德，兩人褲帶結相黏，是感情真好的兄弟。
就佇我認真畫圖，當咧想講，欲替課本內底的作家，加兩條喙鬚，抑是三條的時陣，雄雄聽著老師，用伊響亮的聲音，喝一聲：「齁！你們為什麼把手疊在一起！斷背山齁！」
斯當時，李安《斷背山》當hit-tok，法律有規定，猶未12歲的囡仔是袂當看的哦，所以我和我的同學，當然無看過，毋過加減有聽大人講：彼是一齣咧搬，查埔人佮查埔人談情說愛的影戲。聽老師喝彼一聲，我就隨夯頭，真自然就看對阿文佮阿德的方向。我也毋知影，我是毋是目睭花去，但是我親像看著阿文佮阿德，原本疊做伙的手，佇老師喝彼一聲了後，煞雄雄狂狂，抽轉去。
逐家聽老師按呢講，其實也當做老師是咧激五仁、講笑詼，所以無人注意著in兩个人的反應，蓋成干焦我，看著in頭犁犁、淡薄仔礙謔的表情。
這件代誌，就按呢予逐家忘袂記。一直到有一工，上體育課，彼當時的查某囡仔足流行手牽手做伙走運動埕，親像按呢牽咧走，就變甲較輕鬆。我佮阮朋友走到第二輾已經怦怦喘，煞聽著體育老師喝講：「跑步就跑步，牽什麼手！」，害我佮我朋友驚一趒，緊張甲趕緊將手放開，但是連鞭就聽著體育老師閣補一句：「男生還牽手！」
嘛毋知影為啥物，我隨想著阿文佮阿德，越頭佇運動埕揣in兩个人的形影。我看著in走做伙，手並無牽咧，我心內真憢疑，敢講，老師咧講的人，毋是我和我朋友？敢講是阿文阿德？
這个問題，一直到我畢業進前攏無答案。
後來阮畢業了後，阿文佮阿德也讀無仝的國中，各人行各人的路，無閣再聯絡。三、四冬過去矣，有人辦同學會。大家攏來，就干焦阿文佮阿德無到。彼工轉去厝了後，我有敲電話予阿德，我問伊：今仔日你哪會無來，阿文，嘛無來呢？伊只是應講：按呢喔？我又閣問：你佮阿文敢有聯絡？伊講：已經真久真久無聯絡矣⋯⋯聽起來有小寡為難。我捌佇面冊看著阿文有交女朋友，阿德⋯⋯我就無看過矣。
經過遮濟年，我定定咧想，若是彼當時in兩個人共手疊咧，甚至共手牽起來的時陣，老師無講耍笑，也無共in阻擋；同學無共in恥笑、創治，課本也教講，查埔佮查埔相愛，查某佮查某談戀愛，是一件真正常的代誌；按呢in是毋是，就會使光明正大，牽對方的手，坦白面對家己的心意，佇彼的茫茫渺渺的年歲，對家己的理解閣較深？凡勢in就會使手牽的，同齊行到閣較遠的所在，一世人透流。（意思：類似華語的「套牢」）
有一寡人堅持愛共囡仔教講，查埔干焦會使愛查某，查某就會愛查埔。但是你佮意著啥物人，遮的心情、過程、經驗，攏是課本無法度教予你，嘛毋是任何人會當控制的，交由你家己斟酌體會。
囡仔兄，囡仔姐，聽完這段故事，你敢會感覺心慒慒（tso）？。英韶阿姊，故事就講到遮，向望逐家就愛尊重別人、珍惜家己，咱後改再會。
