腳本：
Ep.3 主題化一場空
Ｐ：欸，韶的，人攏有想15秒的opening呢
Ｓ：15秒？人攏30秒啦，你是攏無主題無啥通好講是無？
OPENING： Piano Concerto in A minor, Op. 16 - I. Allegro molto moderato by Edvard Grieg
ENDING：Keyboard Suite in D Minor, HWV 437: III. Sarabande by George Frideric Handel (play by
Constantin Stephan)
＿＿＿＿
Ｐ：欸，韶的，我發現咱的siān人（jîn）已經有29个呢
Ｓ：你講啥物siān人？是好心好行，做善事彼个善人喔？
Ｐ：我的意思是講，跟綴咱的節目的人，已經有29个啊
因為咱咧講話，足厭siān的
啊聽會入耳（ni2）的人
毋就是也是對這个人世間厭siān、感覺足siān的人。
華語講「負能量、厭世感」
所以就是叫做siān人啊！
Ｓ：喔是按呢喔，聽起來有幾分道理呢
毋過我感覺，會綴阮的電台的人，
也真正真偉大、真善良，所以嘛是會使叫做善人啊。
Ｐ：嘿啦嘿啦，毋過，我看遮的siān人
應該有一半以上攏你的朋友吧
恁姊仔、恁母仔……
Ｓ：無啦，你毋是有啥物謝啥物
對你是一片癡情佮真心
若無共你的朋友點名一下啦
Ｐ：按呢敢好？你按呢是毋是咧提情份共人刁？（情緒勒索）
Ｓ：無啦無啦，咱毋是，
中華民國臺灣警備總司令部
中華民國臺灣警備總司令部（台語）
Taiwan Garrison Command
袂共人點油做記號啦。
總講一句，各位siān人、善信大德
恁的支持，是對阮上大的鼓勵！
請繼續收聽英學宇宙
用文組漚潲爛骨的痟話
陪伴你，度過每一段厭siān的時間。
Ｐ：講著陪伴，你毋是最近有欲推出
Ｓ：正港囡仔大細攏會使聽的「暝床邊講古」
就是據在我暢……等咧？
我爽的時陣，欸毋著
哪會聽起來攏怪怪？
Ｐ：應該愛講「暢」，「爽」較粗啊。
Ｓ：我感覺是「暢」呢……
（遙遠的背景音：欸媽媽，你感覺這三字佗一字聽起來較粗？）
（媽媽：爽）
竟然是「爽」
Ｐ：若無講快樂、心適啊
Ｓ：好啦，橫直咧，
這个「暝床邊講古」
就是專門欲錄予囡仔人聽的
向望逐家來聽英韶阿姊講晚安故事～～～
Ｐ：而且竟然無任何宣傳就有10个人收聽！
Ｓ：無錯！按呢掠準咱這个節目按怎下流
咱上無閣有這个「暝床邊講古」鬥楗
欺騙社會大眾
咱是有營養、有意義的節目
歡迎逐家，若有適合講予囡仔聽的故事
抑是建議攏會使共咱講喔！
Ｐ：嘿，閣有第三件重要的代誌
就是咱有過（ke3）年的特！別！節！目！
Ｓ：過年（kue3）啦，台北人是欲去隔轉年過年喔
Ｐ：（不理會）嘿，
就是咱有過（ke3）年的特別節目
佇30暝～開始放送
會陪伴逐家，對歇假到上班彼工
逐日的翻點，就會放送
按呢你透早起來就有地聽喔！
Ｓ：請各位阿君，毋通僥阮（僥：辜負）
來辜負咱的心意
（哭調仔）無人來聽啊～～，亨嚕～亨魯亨嚕亨嚕
Ｐ：哭喔，你閣真正咧唱哭調仔
你莫彼工新正唱這拍觸衰（phah-tshik-sue）
阮會真正無聽眾欲聽喔。
Ｓ：好啦好啦，啊橫直三件重要的代誌攏講了矣
按呢，咱節目？就到遮……？
Ｐ：欸欸，才幾分鐘啦，
咱才拄咧感謝觀眾的支持
就隨欲開始貧惰
你嘛假一下
按呢敢有天理
Ｓ：哎唷好啦，遮嚴格……
啊，著，我有接著真濟siān人的意見
in攏講，阮就愛有主題
主題化，按呢才會當唌人來聽
Ｐ：咱的主題？有啊
就是一禮拜輕鬆
就是一禮拜沈重
Ｓ：嘿矣，咱毋是早就按呢應付過去矣
想袂到，遮的siān人耳空這利……
嘛是有人感覺咱的節目散散
真濟siān人攏講愛有主題
Ｐ：（加快）按呢喔，毋過
其實阮兩个頭起先想欲錄這个節目上蓋原始的初衷、主旨、核心概念
就是咧講台語應該和華語、英語會使用佇任何所在，亂七八糟來開講
會使形容任何物件，有家己的語境
親像英文ICRT共台語當作生活的語言
無啥物特別的目的。
有的podcast吸引觀眾，就揣好耍的主題
有人是股票
有人是讀書
有人是新聞
有人會箍觀眾
足濟人攏是會向商業的方向
去考量市場的需求
啊咱，就是無法度趁大錢的文組啊
啥物攏會使講
Ｓ：嘿矣，其實咱兩个就是咧鬥喙鼓、剾洗人
而且咱平常時為著欲剾洗對方
講話攏讀長音，若無就是用無感情的聲音照唸
無就是棒讀、應付
結果顛倒予人當做咱咧唸口白
ＮＯＮＯ，咱講話本底就是按呢啊，真正冤枉呢！
Ｐ：哀，咱已經無信用矣
Ｓ：閣有，你看喔，出名的「百靈果」
人寫講：用雙語的對話包裝知識，用輕鬆的口吻胡說八道。
閣有真受歡迎的「台灣第一通勤品牌」
每一集的主題看起來，也親像是咧開講
毋過in也是攏真認真做、有設計節目，所以吸引真濟聽眾
啊咱嘛是攏那開講，那窒一寡仔笑詼入來啊
真認真咧講「高級的糞埽話」呢
Ｐ：你確定咱真認真？
Ｓ：我發現聽人用台語開講
誠實有一个「崁」
或者是講有一个「戶碇」
尤其是這款，毋是咧講
「啊恁囝佇佗位食頭路」
「啊是娶某未？」
「隔壁彼个阿蓮按怎按怎」
這種話題
Ｐ：蓋成就是講，
有部份的人會感覺，台語無法度討論嚴肅、認真的物件
自然、地理、歷史
往過佇學校讀的物件
攏著愛用華語
若用台語、母語，就予人感覺怪怪
華語就叫做「違和感」
毋是講，咱咧看台語無
是真正就是按呢
Ｓ：我知影有一寡人有咧拼這塊
毋過我感覺，台灣人真慣勢佇正式的場合內底
家己切換做用華語講
蓋成按呢講較高尚
佇國會內底，用母語問政的人就是真「特別」
掠阮母仔的例來講
阮去餐廳食飯，
伊開講阮兜的代誌攏用台語
但是伊若用外人聽有的音量咧叫我
叫我「去拿紙巾」會雄雄變做華語
Ｐ：對我來講
這是一種和華語英語仝款
阮就是換做用台語
伊按呢做，袂感覺奇怪
但是台語若按呢做就是奇怪
Ｓ：喔，按呢是毋是閣欲罵國民黨
就是in的黨國教育造成的
Ｐ：有歷史的緣故，毋過閣講真正就無聊矣！
Ｓ：歹勢歹勢，1450症頭閣夯起來
Ｐ：（加快）橫直，現此時來講
這个節目有試驗的感覺
就是台語閣繼續行
除了揹使命感、振興母語這款重大的責任
我感覺自然使用語言來講話
這才是真正解決的方法
毋免閣踏漉糊仔糜
Ｓ：你意思是遐的人攏咧踏漉糊仔糜
Ｐ：齁，我毋是彼款意思齁
你莫共我陷害！
我是講，台語欲消失欲斷種，真危急
咱攏知影，也攏希望做伙來拍拚
莫予臺語牢佇彼種沈重的感覺
毋過也有人感覺
台語若錄podcast
蓋成有一款「台語電台化」的感覺
就是愛賣藥仔啊、批評幾句政治
Ｓ：喔，你是講【工商服務時間】
乖孫的，阿媽有煮麵，
哎唷，你這箍夭壽死囡仔，
啊你毋是戇甲袂扒癢？
哪會一直咧抓lan7
（抓癢聲）
無啦，阿媽、阿媽，我遐足癢的，
都按怎扒癢，攏無效啦
哎唷，僥倖喔
阿媽遮有一塊抓lan7雪文
乖孫的提去洗
阿媽頓胸坎共你掛保證，絕對有效
好，阿媽，
我這馬就撏出來洗！
（水聲）
哇，真正攏袂癢的呢！
各位聽眾朋友
平常時遐癢、遮癢
大膽抓落去攏免想
毋過你若lan7癢癢，
驚人看你歹面tshiunn
你就聽我的主張
抓lan7雪文共洗落
免閣煩惱抓破皮
上重要的是，這塊雪文是MIT
臺灣製造 Made in Toilet
免用China貨
包你
聽眾朋友
1塊2千？毋免！
1塊1千？傷濟！
零星錢攢予便
算你9百9十9、9百9十9
999，你就袂閣癢癢癢
以上節目由英學宇宙冠名播出
Ｐ：等咧等咧，你是咧講啥啦
自從頂一集phoh男去抱lan7、圖書館就相幹
咱是攏愛行這款風格就著矣
而且你攏講這款物件
人敢會感覺台語攏足下流的？
Ｓ：（加快）無nooh，這確實是台語文化的一部份
重點是提來創啥
親像咱講這是講心適、趣味的
而且咱講遐濟，聽眾若是
這嘛是咱欲共聽眾教育的
台語的的活力
藏佇這款空縫內底
掠這條「鹽埕區長」
Ｐ：你講1964年，郭萬枝作曲的彼條。人攏講旋律是「牛馬調」、「高雄調」，閣有人講「萬枝調」
Ｓ：著，天使唱片的。毋過這个歌詞，我感覺可能是一陣人寫的
就親像咱兩个，烏白講幾句來創一寡仔好笑的物件
可能就是有人咧共伊剾洗，結果郭萬枝閣去告天使唱片
毋過這歌詞真正厲害喔
我唸兩句
「半爿山頂有一空，內面一空烏弄弄；伸手欲摸無半項，哎喲，咁是彼路仙洞空。」
「深山林內一條溝，溝中一粒紅石頭；千軍萬馬袂得到，哎喲，只驚一粒和尚頭。」
用文雅的詞來形容人毋敢講明的物件
彼正正就是媠氣的台語
頂一集我講彼个返校內底的「粕男」沈華，共伊的紅和尚頭撏出來
其實紅和尚頭就是查埔人的遐若當咧暢？爽？就會親像是和尚無頭毛的頭，閣紅紅
毋知影逐家敢會使體會？
親像阮母仔，伊真正聽我咧解說，嘛是笑甲kah-kah叫
Ｐ：是啊，這種台語的語境
已經毋是每一个人聽了攏會笑hai hai啊
聽有了後，敢會使理解內底藏的笑詼？
咱就是向望閣較活潑的
予台語真正咧自然使用
用這款試驗性的節目
予逐家勇氣
親像我談台語這漚攏做會到
各位siān人真正免驚
Ｓ：（加快）
嘿啊，一步一跤印來講、來學
咱就是講出來予人笑的
予這个語言充滿快樂和意義
啊尤其阮兩个閣貧惰
恁逐禮拜聽15分鐘
對恁是考驗嘛好、輕鬆嘛好
毋過對咱兩个，已經足粗殘的矣啦
Ｐ：看咱的友台「飯桌仔」
人也是真認真咧做點半鐘、一點鐘的節目
閣做一寡仔專訪
台南妹仔也有咧教台語，也是趣味趣味
去揣網路，資源足濟的
足濟老先覺推捒、保存
也有母語社團欲擴大講台語的族群
這馬也有台語台
閣有國家語言發展法……
Ｓ：欸欸等咧啦，咱按呢講
咱的節目就變做凡間的教育節目矣呢……
你講這敢有人欲聽？
Ｐ：好啦，橫直阮講完主旨、核心概念
針對主題的部分，咱閣咧掠方向
逐家，攏會使寫意見予阮
欲用毋用猶是由在阮
（笑）
Ｓ：嘿啊，橫直咱就文組漚潲爛骨
Ｐ：這佮文組漚潲爛骨有啥物關係？
Ｓ：啊咱毋是講好矣
逐改攏愛用這句做結束！
Ｐ：喔著齁
Ｐ：上重要的是，各位sian7人，請準時收聽過年特別節目。
（Ｓ的背景音：30暝到初六～30暝到初六）
