腳本：
Ｐ：欸韶的，人攏有想15秒的opening呢
Ｓ：15秒？人攏30秒啦，你是趕欲去過年喔？
OPENING： Fruhlingsstimmen Op.410 by John Strauss Jr.
ENDING：Radetzky Marsch by John Strauss
＿＿＿＿
Ｐ：欸欸明仔載就是過年矣呢
你敢有欲創啥
Ｓ：我按算今年和舊年仝款
做十全的防疫ik8
我舊年蓋成干焦一日出門食飯爾爾
而且應該累積起來，
出門的時間無超過五點鐘呢
Ｐ：啊你敢毋免出門買中晝
Ｓ：免啊，阮母仔和阮姊仔攢便便呢
我的尻川毋甘離開我四序的椅仔～～
Ｐ：我就無這幸福
阮兜是開𥴊仔店嘛
過年的時厝邊隔壁攏會轉來，是規年上無閒的時陣
無地走唷
毋過，這幾冬，過年氣氛真正日日無去
以前攏會貼門聯、去別人in兜拜年、放炮仔，逐口灶攏會攢一大堆物件拜拜，這馬親像食飯就煞矣。
Ｓ：講著這，我想著一件代誌
就是我做囡仔的時陣
捌有一改，過完年，有賰一寡炮仔
其中一種就是仙女枝
華語叫做仙女棒
阮母仔共仙女枝用lài-tah共伊點予著
叫我提咧
我就戇戇提向我的喙䫌一直燒
毋過蓋成後來
皮膚嘛是好原在
無留啥物傷痕呢
我嘛是繼續做仙女（ＢＧＭ：講啥物，我親像，天頂的仙女）
Ｐ：可能是少歲啦，新陳代謝真好嘛
親像蛇咧換新皮
你講著放炮仔
我就想著過年的傳說
你敢有聽過年獸的故事？
Ｓ：有啊，課本攏會教講
古早古早，有一隻叫做「年」的怪獸會食人
啊後來發現，伊傷驚
紅色、大聲、閣有火
為著欲共伊趕走
逐家就是用火，燒竹仔
這就是爆竹，臺語叫做炮仔
然後人類也貼紅色的紙
欲共「年獸」趕走
華語叫做「春聯」，台語叫做門聯mng5
Ｐ：這个故事你無感覺
和摩西（mô͘-se）𤆬以色列人出埃及的故事足成？
就是聖經內底的《出埃及記》。
上帝耶和華欲叫埃及的法老放以色列人離開，予以色列人服事（ho̍k-sāi）上帝。
就顯能降災厄佇埃及警告法老
比如落大雹（pha̍uh）、死精牲（cheng-siⁿ）
內底有真濟講起來真恐怖，但是真媠氣的台語。
親像〈出埃及記〉第10章就講，法老毋肯予耶和華的百姓去，「耶和華就互東風(tang-hong)通日通暝吹佇地裡；到明仔早起，東風就將草蜢吹來。草蜢上來埃及遍地，歇佇埃及的四境(sì-kéng)，利害到極；從前(chiông-chêng)無有按呢的草蜢，以後也無欲按呢。因為in遮蓋全地，致到地攏黑暗，閣食(chìa̍h)地上一切的菜蔬及樹裡的果子，雹所拍無了的。埃及遍地，無論樹木，抑是田裡的菜蔬，無留一項青翠的物。」
Ｓ：欸欸等咧啦，你這跤冊櫥仔，好通關起來矣喔！！
一下仔講雷蒙威廉斯拉康傅柯
一下仔講佛經
這馬竟然閣咧講聖經？！
而且閣講甲躼躼長，你是有收基督教的錢喔？！
Ｐ：予我講了啦！！我這改正經有查資料欲來向各位sian7人傳智識齁！！
Ｓ：好啦好啦，尊重，友善，包容（？）。
Ｐ：總講一句，上帝雖然降一大堆災厄，法老原仔無軟心，親像咧賭氣
洛尾，上帝欲刣死所有埃及人的大子，就吩咐摩西叫怹的人攢羊仔、食羊仔，將羊仔血抹佇厝雙旁的門竪(khiā)佮門楣(bâi)。
按呢以色列人就會當覕過災厄
Ｓ：聽起來確實有仝款的所在
就是攏做一寡仔記號和舉動
欲共災厄趕走
in這敢有變做啥物節慶
Ｐ：有呀，這工也成作怹的過年，盤過節（pôaⁿ-kè-chiat）華語號作逾越節，pass over，迒過的意思。就是以色列人夆閬過。
Ｓ：喔喔，啊為啥物愛用羊仔的血矣？
Ｐ：其實羔羊佇天主教、基督教是足重要的符號，比如會講耶穌是神的羊仔。
羊仔尤其是羊仔子，有贖罪、去除原罪的涵義。天主教也有一條出名的彌撒歌，就叫「羔羊頌」 。
Ｓ：是按呢喔
我想著以前看戲說台灣
也會有啥物烏狗血
潑人兜的門
就會害伊啥物保護、咒語烏有去
Ｐ：嘿，烏狗血彼算是以毒攻毒
講轉來咱台灣人的文化
你敢有聽過沉地的故事？
Ｓ：有喔，台灣的慣勢就是24送神
意思就是講
感謝咱身軀邊的眾神共咱保庇
眾神愛轉去天庭報告
這一冬凡間發生啥物代誌
照逐家的習慣
愛請灶神食糖仔
灶神、灶王爺tshau3-sin5
是較漢人的文化
因為伊是主要是欲向天公
報告恁兜咧創啥的人
所以愛予in食甜甜
欸，毋過，按呢講起來，哪會毋是地基主去報告？
阮兜過年、普渡，也攏會做伙拜地基主呢！
而且也是佇灶跤拜
Ｐ：地基主應該較像咱華語咧講的地縛靈
蓋成和西拉雅族的阿立祖有關係
S：彼應該愛來請教咱的友臺
飯桌仔的主持人Amos
伊是西拉雅的專家呢
Ｐ：嘿矣，人較有智識
親像我這馬欲開始講故事就無人欲聽啦
Ｓ：好啦，你講啊，莫使性地
Ｐ：就是咱厝內有真濟項物件
其實攏有神明咧共咱看顧
親像箸，也有箸神
猶是拄才講的灶神
壁頂油燈就號燈猴，有人講燈猴是燈勾的chōaⁿ音，也有人講是因為燈台看起來成一隻猴
以早有一種風俗
冬節會趖圓仔
共圓仔黏起去，就是叫做 phu5圓仔
紅金白銀
就是請遮的神明食
結果逐家攏有感謝著
人類偏偏共燈猴放予袂記
伊就想規年迵天，佇烏暗暝
予恁人類有光線通好看
實在這口氣無法度吞忍
返去天庭就共玉皇大帝哭講
人類偌䆀拄偌䆀
玉皇大帝就決定欲處罰人類
欲共規个台灣島沉落海
就是沉地的傳說
講到遮
逐家敢有發現世界各地的文化攏足愛用做大水當做天罰
Ｓ：嘿啊人類就欠處罰
Ｐ：毋是啦，我是講沉地、做大水
基督教、原住民攏有做大水
Ｓ：因為海水就佇遐，共你攢便便
無親像火，閣愛家己點予著
Ｐ：你按呢講也著啦．．．
Ｓ：閣有吳新榮
有一首寫的詩 「誰能料想. 三月會做洪水」
講「啥人料想著三月會做大水！」
彼个做大水就是咧講二二八
伊也是用大水來形容一款災厄
Ｐ：你看，這就是文組文化參照的能力
咱毋是講故事爾爾
Ｓ：你按呢講親像咧講有人無彼款能力…
Ｐ：你又閣咧共我陷害！
P：講著參照，其實咱台灣過年的風俗攏四界濫矣
比如貼門聯學校攏講春字和福字愛貼倒爿，用華語講「福到」、「春到」。顛倒是到的諧音。
但是台灣話就會講有賰有福，春字就貼佇冰箱，表示有賰山珍海味。
各地食的也有精差，下港、頂港的長年菜好親像就無仝，阮是芥菜，恁應該是…？
Ｓ：
阮是菠菱仔菜呢
而且愛規欉食落去，袂使哺予伊斷
按呢才會活較長壽的！
其實講這濟，
我第一改聽著沉地的故事
是我讀大學了後。
我以早毋捌聽過送神的故事，
彼是我佇人的文章看著才知的
轉去問阮母仔，才知影，
伊是佇學校學著「年獸」的故事
毋過這个沉地的傳說
卻是伊做囡仔的時陣
每一年過年，攏會做的風俗
伊會共圓仔黏壁頂，也知影彼叫做「phu5圓仔」
啊這正正才是臺灣人過年的傳說、風俗
結果咱的課本內底
竟然攏毋捌教過，燈猴的故事
嘛因為真濟風俗攏濫做伙矣
若有相siâng的風俗
就親像你咧講彼「春」的貼法
這，攏袂有人去懷疑伊為啥物有時陣
是倒反貼，有時卻是，正貼。
用課本來教人這
共某一種「漢人」的文化
某一種「中國」的文化
硬篤窒入去你的生活內底
予你感覺，咱中國～～～咱臺灣～～
是仝一款文化～是仝一國～兩岸一家親（ＢＧＭ：親，親你去死啦）
Ｐ：嘿，著，這就是意識形態，才真真正正是「國家機器」。毋是進前予人烏白用的彼個啦！逐改聽著人講「國家機器動得很厲害」，頭殼就moh8咧燒，膦脬著強欲著起來。
Ｓ：喔，你是講「國家機器動得很厲害」
你是講食韓國魚，祝逐家年年有餘？
過年講這隻魚⋯⋯啊我是講國家機器啦，真正是拍觸衰呢！唉呀，1450的症頭擱欲夯起來。
P：毋過過年就是向望講逐家趁大錢、大趁錢、有福氣，有時陣計較原仔愛計較，有時陣親像傅柯講的：權力推撨，若是了解符號、權力背後的意義齁...
S：好啦，你這跤冊櫥仔好關起來矣，過年無人欲聽你講這。
P：總講一句，向望咱這的sian7人新年好福氣
S：嘿啦，祝逐家新年快樂，萬事如意。
