Ep0 療癒抑是悲哀

2021.01.17

「如果可以簡單,誰想要複雜?」 OMGOMGOMG,世界真正複雜,如何才有辦法簡單?

· 腳本

腳本:

Ep.0 療癒抑是悲哀

S:韶的,P:柏仔

OPENING: Pomp and Circumstance Military Marches, Op. 39 by Sir Edward Elgar.
ENDING: Prelude Op. 28, No. 4 by Frédéric Chopin

P:欸欸,別人攏有想15秒的opening

S:15秒?人攏30秒啦!

若會使15秒,啥人想欲困難。

若會使簡單,啥人想欲困難。

P:欸,逐年年底我攏會注意書店的排行榜。

毋過前幾名看起來基本上攏嘛是心靈雞湯彼種,使人足感慨,袂輸敢若逐家心理攏有缺欠。

S:你是講親像「如果可以簡單,誰想要複雜」這款作品?你竟然有看(鄙視感)

P:嘿啊,有掀一下啦。

你敢無感覺足好奇,到底內底是咧寫啥?

你家己做一個文學研究的人

雖然咱攏剾洗家己漚潲爛骨,徛佇天頂的抾捔文組

原仔猶是愛去了解一仔凡間的文字

尤其這款冊的銷量,哪會定定衝甲尾溜攏掠袂著?

咱家己研究的文學,真正是車尾都看無,煙筒管的煙都無通su̍t。

出版業是愈做愈食力

啥物冊攏賣無好勢

啊人Peter Su印冊煞親像印臺票

一版閣一版

普通寫冊的人頭版賣有lī著謝天謝地

欲再版著盤山過嶺

啊到底這種冊為啥物通唌--人來看

你敢袂足好奇?

S:加減啦……

毋過佇人類文明的世界

確實有這款「向前行」現象

(BGM:「hooh~再會啦,hooh~向前行」)

講著逐年攏銷真好的冊

這心理健康的冊一直攏是前幾名

親像2010年陶晶瑩「我愛故我在」

我這有一份資料

是一位研究生袁孝康的論文「台灣勵志書籍的系譜(1950-1990)」整理的

統計金石堂逐年的銷甲上好的冊

捒轉去2000年來看

就有出「有愛就有希望」、「衝破命運的藩籬」這款安搭人心的冊

也有「小卒變英雄」、「庄頭囡仔出頭天」是咧拍拼的

1991年銷上好的是「為自己活」(黃明堅)

1988年銷上好的是「十句話」(隱地)

若看差不多1984-85年,是「愛、生活與學習」(利奧巴士)

https://nccur.lib.nccu.edu.tw/bitstream/140.119/33249/12/51026112.pdf

攏是這款咧鼓舞人心的冊

啊我細漢的時陣,

看過一套「勵志書房」的冊

冊名就是親像:

偝(ainn7)小妹大漢的囡仔

賣花的查某囡仔

拭皮鞋的囡仔

抾歹鐵仔的囡仔

內底的人攏有夠悲哀啦

毋過上重要的就是只要認真來拍拼

BGM「只要用心來拍拼,一定唱出阮的名」

就有機會出頭天

最後攏是真樂觀的結局呢。

P:嘿啊國外有海倫凱勒

一个目暗閣聽無的人最後煞真有成就

咱台灣也有

親像鄭豐喜、謝坤山、周大觀這種殘而不廢的精神代表

咱讀國校的時陣都有看鄭豐喜的電影《汪洋中的一條船》

閣是用有夠緣投秦漢搬鄭豐喜,這馬想有夠哭夭。

謝坤山就是定定看著伊畫的圖

講伊雖然無手

猶是會使用伊的跤和喙來畫圖

謝坤山也有出冊

彼款鼓舞的心態

親像一隻蛇

佇各種文化藝術內底

咧軁來軁去

親像咧講,怹身軀有問題原仔遐邇骨力

咱身體健康煞會使放棄

S:其實佇流行文化內底也是

親像台語歌內底就有

人攏當做台語歌真濟悲歌

其實這款骨力拍拼的歌曲也不止仔濟

1978年葉啟田所唱的「人生」,呂金守作詞

原曲是市川昭介做的日本曲「夫婦(めおと)春秋(しゅんじゅう) 」

BGM「有時天光月也明 有什通好凝 認真打拼不通停 創造著前程」

1988年陳百潭作詞作曲,衝甲掠袂牢的「愛拼才會贏」

BGM「三分天註定,七分靠拍拚,愛拚啊啊才會贏」

拄才講著的,林強1990年彼條「向前行」

BGM「hooh~再會啦,hooh~向前行」

閣有2005年江志豐作詞作曲,翁立友演唱的「堅持」

BGM「只要用心來拍拼,一定唱出阮的名」

葉啟田,一直到2017年,

也是推出郭大誠作詞作曲的「人生看頭前」

BGM「心肝著愛放乎清,目睭著愛看頭前,頭前有充滿著,無限的光明」

按怎艱苦,猶是愛看向光明的歌曲

P:你講的這就是,雷蒙德威廉斯的情感結構

意思就是齁,一个社會……

(洨阻擋柏講)

S:好啊好啊,你這跤冊櫥仔門,好通關起來啦

你繼續講落去,我就欲睏去。

P:好啦。咱講著這个現象

其實齁,干焦咱這款文組的漚潲才會感覺悲哀

逐家攏行向光明

但是無人看有大家心理的烏暗

你看,咱讀的文學真濟是悲哀的故事

那親像干焦悲劇才會成做偉大作品

悲慘世界、伊底帕斯、哈姆雷特、馬克白這種悲劇

甚至有人講,上高明的喜劇其實是悲劇。

S:你按呢講,我就想著一个我真佮意的作家

伊叫袁哲(tiat)生,這馬可能較少人知影

伊有寫過小說「秀才的手錶」「送行」「猴仔」

伊傷出名的是「倪亞達」,閣有改編做電視劇

毋過除了拄才講的,就講著有一本中篇小說「羅漢池」

有一个所在蹛真濟羅漢跤,叫做羅漢埔。

P:有有有,我也有看過這部小說

「羅漢跤」這个詞應該逐家攏無生份

S:嘿啊,臺灣清朝就有真濟羅漢跤

意思就是孤身的人

這本冊就是咧講,一陣羅漢跤攏徛佇仝一个街仔路

因為彼个街仔路,有一條大路迵頭迵尾

閣蹛一个袁哲生寫甲有夠媠的月娘,

為著查某囝和老母

姑不而將,無tan-hua5

只有是去庄仔內的酒樓討趁

綴in老母的後路,也去趁食。

逃袂過命運的鎖鍊

BGM「命運的鎖鍊」「牽來牽去一條鍊,一條命運的鎖鍊鎖鍊」

P:這个故事,聽起來,無彼款家破人亡的譀古代

就敢若食白茶,啉落去,無鹹無汫。

S:著,我感覺袁哲生真gau5用平靜的口氣來講故事

伊無共你講人生大悲大喜、悲歡離合

也無講拍拚、鼓勵人心的故事

卻是講一種,四界隨在看有的人

in就是無法度脫離性命的枷鎖

P:按呢我就想著中國的詩人

號做「海子」

伊有一條詩「面朝大海,春暖花開」(先唸華語,再唸台語)

從明天起, 做一個幸福的人

餵馬, 劈柴, 周遊世界

從明天起, 關心糧食和蔬菜

我有一所房子, 面朝大海, 春暖花開

從明天起, 和每一個親人通信

告訴他們我的幸福

那幸福的閃電告訴我的

我將告訴每一個人

給每一條河每一座山取一個溫暖的名字

陌生人, 我也為你祝福

願你有一個燦爛的前程

願你有情人終成眷屬

願你在塵世獲的幸福

我也願面朝大海, 春暖花開

S:聽起來,無論是飼馬、破柴、環遊世界

抑是關心糧食和菜蔬

閤有和親人通訊、替河和山號名

這款代誌,明明現此時、今仔日,也會使做

伊煞強調講,明仔載才來做

這是因為,今仔日,已經無法度閣做遮的代誌?

P:嗯。我讀這首詩的時陣,

就有一種

伊已經無法度佇這个現實的世界揣著幸福

伊對這个人世間已經無留戀,

才來決定欲行短路

對過往的明仔載開始

做一个幸福的人

落尾海子也就躺佇鐵枝路

迎接伊所向望的幸福

S:是啊,有的人的文學

就是共這種悲哀的心情寫出來

毋過,就親像勸世歌內底講的生死情理

「註生婆姊無公平,代先註死才註生」

就是咧講,咱人有一工攏愛面對死

這兩句,也就是咧怨嘆無法度改變的代誌

毋過活佇人世間

是無可能一直浸佇彼種心情內底

所以彼句勸世歌詞頭前兩句雖然是

但是後壁講「人的尾溜看毋見,圓人會扁扁會圓」

意思就是講,人,猶是真有可能性

因為你閣欲活落去、欲向前行

所以你就愛去揣一寡樂觀的冊來看

這可能就是心靈雞湯遐衝的原因

因為既然現實已經無法度改變

你的心頭就愛放予清

所以這寡冊in主要的內容

攏是咧治療「現此時」

in袂閣去共你講

未來的路偌艱苦

in要緊的,就是「現此時」愛振作。

P:嘿啊,所以講齁,

咱這馬咧討論這

蓋成也是無較縒

就親像華語有一句講「馬照跑,舞照跳」

結果咱佇遮想空想縫、逃避現實,

啊毋就是咱文組咧做的,毌才講自己是漚潲爛骨。

S:嘿啊,悲哀喔。

所有文章
×

快要完成了!

我們剛剛發給你了一封電郵。 請點擊電郵中的鏈接確認你的訂閱。

好的訂閱由Strikingly提供技術支持。