腳本
P：人攏有15秒的OPENING呢！
S：啥物15秒，人攏30秒啦。你是228自助餐烏白呻
Opening & Ending： Etude Op. 10, no. 12 in C minor - 'Revolutionary' Composed by Frédéric Chopin Played by Chiara Bertoglio
──────────
P：欸欸韶的，春天又閣到矣，這个時間毋但春暖花開，閣新年好氣氛~
S：春天時～～（草山）
欸講著草山就想著蔣介石
P：你啥物攏欲講著彼箍，你這1450的症頭誠實是過症，chín-嚴重喔～
S：欸，毋是齁，這條歌是洪一峰的寶島四季謠，洪老師講，當初時，伊歌詞內底這兩字「草山」就引起相關單位的關心，講草山已經改做，紀念某物人的愛人王陽明，的「陽明山」啊啦！彼相關單位叫洪一峰家己想辦法窒三字入去彼句內底，若無就袂使想。啊唱做：春天時 陽明山⋯敢會聽得？
P：原來有這款緣故。毋過，唉，代誌講毋過、不二過，毋才是重點。毋過你按呢講，我就想著，今仔日毋就是上敏感的彼一日！
S：嘿著，二月二十八，一个臺灣人攏會知影的日子。咱倒轉去到，1947年的2月28，昨昏才一个鬥鬧熱的人予查私薰的公務員，開銃怕死，對今仔日起，臺灣人的悲劇才欲開始。每一个縣市，攏有死袂了的人。
P：哎唷～就共你講喔～彼是時代不得已啦～當初是為著持防（ti-hông）阿共，袂使怪罪軍政府、獨裁者，in是咧保護台灣啦。我先註明，我是「反串」（中文），假仙假痟。
S：嘿矣，而且若無加刣幾个，陳儀就會予處份啊！無共遐的gâu人刣刣死，蔣介石的王座是欲按怎坐予在，若無隨時攏有人看一本冊，就會使共伊捒落來，伊暗時哪會睏會落暝～？是講齁，有一陣人，上愛佇遐哭呻（chhan）講，二二八！政治消費！民進黨！1450 atm！逐改攏欲提起往事，講二二八按怎拄按怎？也有人分袂清楚二二八和白色恐怖。
P：ATM你膦鳥，膦鳥癢去買抓膦雪文啦。228甚至講白色恐怖，彼寡受難者的故事攏一直有人咧整理，轉型正義委員會有定期報告是有人去看無？無嘛，毋捌字閣兼無衛生，家己講家己爽。咱也毋免枵鬼假細膩，這集就是欲來講228啦！
S：嘿矣，閣浪費遮久～～咧批評彼寡人，橫直咱就是漚洨爛骨，人免用跤頭趺想也知影，今仔日是228，咱就欲講228！
P：別項莫講，親像我前幾日有看人咧講楊貴（iûⁿ-kùi）（唸一次中文），講伊支持社會主義，就是支持共產主義和紅色中國，所以伊是共匪，國民黨無共伊刣予死，就算有度量矣。我一下看，膦脬規副著起來。楊逵的研究咱台灣文學界的老先覺林瑞明林梵老師，佇1978年早就做過矣，這馬烏白講一句：楊逵支持社會主義，所以伊是共產黨的SPY，到底是咧講啥洨。
S：喔，你講楊逵喔，聽講頂輩的人，攏共伊的名唸做「楊貴」，對in彼代來講，就是加減聽過楊貴這个人。毋過咱一代，對楊逵的認捌，是親像佇國中國文課本的〈壓不扁的玫瑰〉按呢一个堅定的形象，但是以早課本袂教你講，楊逵支持社會主義。啊咱文組漚洨爛骨一定知影伊的〈送報伕〉，就是咧講楊逵的社會主義。楊逵日本時代就咧支持農民運動，反抗帝國主義。國民黨來台灣了後，伊也是白色恐怖的政治犯，寫一篇〈和平宣言〉就關12冬。
P：就是講，所以講伊支持中國共產黨彼款獨裁者，真正是人牽毋行，鬼牽遛遛行。（Lâng khan m̄ kiâⁿ, kúi khan liù-liù-kiâⁿ）
S：嘿呀，伊和葉陶（Iap8-to5），in翁仔某，佇日本時代就有咧支持農民運動，戰後，伊因為和平宣言坐監。離開綠島監獄了後，家己佇東海花園度日，真正是一个堅持理想的人。啊有人會問講，楊貴，按呢伊228哪會無聲無息？人佇國民黨來台灣之後，就寫文章批評國民黨，228的時陣，閣寫文章寫227發生的代誌，鼓舞逐家愛組自衛隊、武裝打扮，對抗國民黨政權！in翁仔某佇228攏是險險予判死刑，逃過死劫，顛倒繼續為台灣人拚死爭取權益。
你看，是有人無咧關心爾爾，楊逵一直攏咧關心台灣社會。
P：就是講。按呢講起來228的時候才關注228的人到底是誰？
S：好啦，無想欲討論遐阿里不達的人，浪費各位善人寶貴的時間。若欲講228，其實網路資料和冊真濟，也免阮講甲傷詳細。阮就來講，印象較深的一寡仔故事好無？
P：親像韶的咧講，這歸冬有真濟人的故事攏予推撨出來。
比如台南有一个做過律師的頭人湯德章的故事就真出名，台文館彼个圓環頂面的公園就是咧紀念伊。
S：甚至有人共伊的故事拍做行動（第七調變第三調）劇。
若有興趣的人，會使點咱這一集附的連結去看。
P：閣有嘉義的畫師陳澄波先生，攏是二二八的受難者，啊毋過濟濟人原仔無熟識。
某Ｔ台記者：（陳澄波本人也相當緊張）
S：嘿啊，就是台灣史無學好勢。喔你講著嘉義的二二八我進前聽過一个印象誠深的故事。
潘木枝，1902年佇嘉義出世，伊予國民黨銃殺的時陣，才45歲。
本底伊是咧做老師，後來去東京留學了後，轉來故鄉做醫生，為鄉里服務。
伊替散凶人看病，袂收錢閣予IN免錢蹛院，是出名的善人。
國民黨來臺灣了後，伊也替捌兵仔免費看病。
戰後國民黨接收臺灣，本底真有經濟實力的台灣，一聲就予國共內戰拖累，而且派來臺灣的兵仔又閣無素質，食錢收烏西，各種行為攏真壓霸，時常咧欺負百姓。除了佇二二七彼工，國民黨的人員刁難一个賣薰的查某人、對伊起跤動手，後來閣無細膩開銃拍死一个看鬧熱的人。種種的原因致使，二二八事件爆發，臺灣人吞忍傷久矣，自按呢抗議、抗爭，欲討回公道、四界占廣播電台，放送國民黨的人做的歹代誌。
也有一寡仔臺灣人，拍外省仔出氣。毋過，也有親像潘木枝按呢，幫助無辜的外省仔，替in看病，甚至是共in安搭、莫予in予情緒激動的人發現。
二二八的故事按怎攏講袂煞，啥人料想會到三月會做大水？三月份的臺灣真正袂平靜。咱知影嘉義的水上機場，也爆發國民黨軍隊和民眾組的志願兵戰甲真激烈，有人講，志願兵就欲拍贏國民黨矣。毋過這陣，嘉義也智識份子也有組處理委員會，做和平大使，想欲調解、打合，結束遮的衝突。
潘木枝就是其中一位和平大使。啥人知影，in過去調解了後，國民黨的軍隊竟然共in總縛縛起來，用酷刑共in虐待，潘木枝的指甲予插鐵釘仔，伊予刑求甲連下頦攏落落來。落尾，伊和其他人，包含畫師陳澄波，牙醫盧炳欽，戲院頭家柯麟，攏予押去火車頭銃決。
潘木枝的第二个後生潘英哲，才14歲的伊，綴人坐起去貨車，欲去救老爸。但是伊無救著老爸，顛倒變做是頭殼著銃的屍體，予人送轉來。潘木枝的牽手驚大漢後生掠去，就共伊藏起來，毋過無想著潘木枝死去了後，大漢後生和大漢查某囝猶是掠去關一站仔。
幾工了後，一位警察共潘木枝的手尾字送轉來，遺書寫甲真絕望，交代牽手，好好照顧囡仔、爸母閣有家己，也寫出遺憾、無奈，閣有對牽手的思念。警察也講，隔轉工——也就是3/25，潘木枝欲予銃決矣。
因為大兄無法度出現，二兄又閣死去。去收屍的是第三个後生，潘英三，伊當時才13歲。聽著銃聲了後，伊kheh入去人陣內底，共老爸攬咧。潘木枝規个人消瘦落肉，而且面已經變形。
潘英三共老爸講厝內的狀況，和二兄死去的消息，老爸流目屎，潘英三最後請in老爸「安心做伊去吧」，紲落來就看老爸佇伊的懷抱當中，漸漸探無氣絲。
閣佇人陣內的第四个後生，潘英仁，11歲的伊也親目睭看著三兄共老爸攏是血的下頦鬥轉去。時間好親像結凍，老爸死去的畫面敢若一張相片，留佇伊的頭殼內，伊流袂出目屎，無法度對這个畫面表達任何心情。
一直到伊大漢，出國留學，有一工佇電視看著蕭萬長公開感謝潘木枝當初救伊、伊閣有佇銃決的現場拈香的代誌，
潘英仁，經過60冬，伊才第一改流出目屎，心內的冰，才漸漸溶去。
其實對in來講，這攏是心理上真大的傷痕！有人自按呢個性大變化，而且真濟受難者的家屬攏有精神方面的症頭，而且閣會影響後一代，但是in攏毋知影彼是因為「政治創傷」，毋知仔源頭，in的病就無法度好原全。
唉，故事就講甲遮，逐改聽遮的故事攏會心酸酸，毋過這款故事真濟，若無開始做轉型正義，遮的家屬毋敢出來講。
P：所以妳講轉型正義是毋是誠要緊！中國咧四五冬前有一齣電視劇，號「瑯琊榜」，真衝！
S：你講有ＢＬ彼齣。
P：恩⋯⋯有成。橫直故事真長，主要就是講有一个王爺和將軍足G U，G U甲予皇帝老父懷疑。就有人趁這个機會設計in兩个，皇帝也順紲將in刣死。13年後，有人欲替in翻案，皇帝就講誣告的主謀已經死矣，為啥物欲追究，翻案的人就講，in毋是欲追究，是欲知影真相。
S：我想皇帝激破頭殼也無法度理解，到底為啥真相有遮要緊，就和國民黨的支持者、彼KOFAN「過去都過去了 ，管他那麼多做什麼」仝款。雖然阮有親像促進轉型正義委員會的組織，但是轉型正義猶是無深化，所以才有這款想法。
P：真相就是和解的因端啦。進擊的巨人妳敢知？
S：我知！拄出來的時，ptt閣有人咧講，作者就是參考台灣的故事。毋過我感覺伊畫的巨人看起來傷成真的矣啦，誠恐怖。
P：漫畫內底也將人分做兩陣，一陣人會使變做巨人，就予人歧視做「惡魔」關起來。袂輸精牲，用會著的時，才提來用，無欲用就挕邊仔。了後主角就想欲報復另外一陣人，來徹底解決歧視的問題，有人就想真粗殘，有人就真贊成。這馬欲結局矣，逐家就咧臆到底結局會按怎，我就無欲洩漏天機，有興趣的人自己去掀漫畫來看！
S：我差一點仔閣欲叫你將冊櫥仔關起來！竟然家己知影愛擋起來。
P：嘿嘿，反正會想講「已經夠矣」、「無閣欲按怎」的人，一般來講攏是華語講的「既得利益者」，既得利益者就是齁，提有好處的人，上顯明的就是大官虎啊，閣有一寡仔藏甲真好的，假做好人，結果橐袋仔毋是袋磅子呢。
S：而且促轉會最近任務毋是欲結束？然後討論講欲閣延長任期？彼一寡也咧拚轉型正義的民間團體，就講，促轉會無應該繼續延長，因為做無好勢，轉型正義的進度足慢！而且促轉會應該是愛共任務傳予各部會，毋是講，講著228、白色恐怖，就攏總交予促轉會。而且促轉會其實無司法審判權，干焦會使做調查、做報告，根本無法度真正有司法的行動。我感覺確實講，愛重新檢討。
啊啊好矣，我家己擋起來，莫講矣，這集已經有夠長，閣講落無人聽無打緊，我閣愛鉸你的喙瀾聲。
P：反正閣再按怎講，牛牽到北京猶是牛，規氣去蹛北京好矣。
S：嘿矣，干焦咱這文組漚洨爛骨會注意爾，感覺228、白色恐怖攏是ATM啦。若真正ATM，咱早就趁大錢做好額人囉。
